भारतको मध्यप्रदेश राज्यले हालै सम्पन्न ग्लोबल इन्वेस्टर्स समिट २०२५ मा ऐतिहासिक लगानी सम्झौता गरेको छ। यो सम्मेलनले ₹३०.७७ लाख करोड बराबरको लगानी प्रतिबद्धता प्राप्त गरेको छ, जुन राज्यको औद्योगिक विकासमा एउटा कोसेढुंगा सावित हुने विश्वास गरिएको छ।
प्रधानमन्त्री नरेन्द्र मोदी द्वारा उद्घाटन गरिएको यस समिटमा २५,००० भन्दा बढी लगानीकर्ता सहभागी भए। विश्वभरका ६० भन्दा बढी देशका प्रतिनिधिहरू उपस्थित भएका थिए, जसले मध्यप्रदेशप्रति अन्तर्राष्ट्रिय लगानीकर्ताहरूको चासो झल्काउँछ। भारतका ठूला उद्योगपति गौतम अडानी, पवन गोयनका, मुकेश अम्बानी जस्ता व्यवसायीहरूले पनि यस सम्मेलनमा विशेष भूमिका खेलेका थिए। समिटको मुख्य उद्देश्य मध्यप्रदेशलाई एक प्रमुख औद्योगिक तथा व्यापारिक केन्द्रको रूपमा विकास गर्नु हो।
समिटमा प्रस्तुत विभिन्न परियोजनाहरूले राज्यको औद्योगिक, पूर्वाधार, कृषि, पर्यटन, र प्रविधि क्षेत्र मा व्यापक परिवर्तन ल्याउने अपेक्षा गरिएको छ। नवीकरणीय उर्जा क्षेत्रमा भएको ठूला लगानीहरूले राज्यलाई हरित ऊर्जा केन्द्र बनाउने लक्ष्य राखिएको छ। यसका साथै, स्मार्ट सिटी परियोजना, आधुनिक यातायात सञ्जाल, तथा औद्योगिक कोरिडोरको निर्माणले व्यापारिक वातावरणलाई अझ सहज बनाउनेछ।
राज्य सरकारका अनुसार यो लगानी सम्झौताले १० लाख भन्दा बढी रोजगारी अवसरहरू सिर्जना गर्नेछ। मध्यप्रदेश सरकारले लगानीकर्ताहरूलाई आकर्षित गर्न विशेष प्रोत्साहन योजना लागू गर्ने योजना बनाएको छ, जसमा कर सहुलियत, शीघ्र प्रशासनिक स्वीकृति, र व्यवसायिक अनुकूल नीति समावेश छन्।
यस समिटले मध्यप्रदेशलाई भारतकै प्रमुख लगानी गन्तव्यको रूपमा स्थापित गर्ने लक्ष्य राखेको छ। उद्योगपति र विशेषज्ञहरूले राज्यको सडक, रेल, तथा डिजिटल पूर्वाधार मा भइरहेको तीव्र सुधारलाई आर्थिक वृद्धिको प्रमुख कारक मानेका छन्। विदेशी तथा स्वदेशी लगानीकर्ताहरूको ठूलो सहभागिताले मध्यप्रदेशको सम्भावनालाई अझ उजागर गरेको छ।
लगानीकर्ताहरूको सकारात्मक प्रतिक्रिया र सरकारले प्रस्तुत गरेको दीर्घकालीन योजना हेर्दा, मध्यप्रदेशको औद्योगिक भविष्य अत्यन्त उज्ज्वल देखिन्छ। यो सम्झौताले राज्यको समग्र आर्थिक विकासमा मात्र नभई, सम्पूर्ण भारतकै औद्योगिक वृद्धिमा योगदान पुर्याउने अपेक्षा गरिएको छ।
\
